بھرے گھر کو انہوں نے گھر نہ جانا

راجہ رجب بولے۔ خان جی مجھے پتہ ہے کہ خان کا لاحقہ رکھنے کے باوجود پٹھان آپ کو پنجابی مانتے ہیں لیکن ایک بات حیران کن ہے کہ اپ نہ صرف اپنے پٹھانوں بلکہ افغانوں تک کے لیے دل میں نرم گوشہ ہی نہیں بلکہ پورا دل ہی نرم رکھتے ہیں۔ میں نے عرض کی کہ پشتون تو خیر اگر ایسا سمجھتے ہیں تو اس کا سبب بھی ہے (صحیح یا غلط ہونا جانچے بغیر) کہ ہماری اور ان کی ماں بولی ایک نہیں، جو ان کے لیے بہت اہم ہے۔ ہاں اپنی کہئے کہ علاقہ، زبان، رسم و رواج ایک ہونے کے باوجود ایک راجہ دوسرے راجہ کے بارے میں ہمیشہ یہ شک رکھتا ہے کہ یہ اصلی راجہ ہے بھی کہ نہیں۔

بولے ادلے کا بدلہ ہو گیا ہے یہ بتائیے کہ افغان یہاں سے کوچ کرتے ہوئے اپنے گھر گرا رہے ہیں اور لکڑی کی بلیاں تک ساتھ لے جا رہے ہیں۔ میں نے عرض کی اس سے پہلے کہ میں کچھ کہوں چچا غالب کی سن لیجیے۔

گھر میں کیا تھا کہ تیرا غم اسے غارت کرتا
وہ جو رکھتے تھے اک حسرت، تعمیر سو ہے

دہائیوں سے آباد مہاجر کیمپ جن کے باسی نام کی حد تک تو افغانی تھے لیکن ایسے پاکستانیوں سے بڑھ کر وطنی تھے جنہیں آپ میڈیا میں روزانہ لنگوٹ کس کے پاکستان کی مٹی پلید کرتے پاتے ہیں۔ ان کی بڑی تعداد نہ جرائم پیشہ تھی اور نہ آپ پر بوجھ بلکہ عجیب ”بابرکت“ مہاجر تھے کہ جن کی ہجرت کی بدولت آپ کے ملک پر ڈالر برسے، ان کے نام پر نئے نئے محکمے وجود میں آئے، انہوں نے اور پہلے سے موجود محکموں کے کارندوں نے، جن کی نیتیں کبھی نہیں بھرتیں پیٹ خوب خوب بھرے۔ لیکن ان بے کسوں کے ساتھ آپ کی سرکار نے جو کیا وہ گرنا گدھے سے اور غصہ کمہار پہ کی کلاسیکی مثال ہے۔ بابا عالم شاہ پوش کے دو مصرعے ہیں۔

حق سچ والا فقراں نے پہیت دسیا
جنہیں کسے نوں اجاڑیا اوہ نہیوں وسیا

(حق اور سچ کی یہ بات مجھے فقیروں نے سمجھائی ہے کہ جو کسی کو اجاڑے وہ خود بھی آباد نہیں ہوا کرتا)

یاد رکھیے آپ نے ظلم کی انتہا کی ہے اور ان مسکینوں کو بے بنیاد جواز کے ساتھ ایسی بے دردی سے بے گھر کیا ہے کہ وہ زمین جہاں ان کے گھر تھے (گھر تو کچا ہی کیوں نہ ہو، باسیوں کے لیے ایک کائنات ہوتا ہے ) ، وہ بھی اپنے مکینوں کے ساتھ نوحہ کناں ہے کہ۔

کچھ دیر ہمیں رہنے دیا ہوتا گھروں میں
کچھ دیر ہمیں بے سرو سامان نہ کرتے