کالم۔

وسیم گردیزی کا ادبی تحفہ اور سبینا کی کہانی

dr khalid sohail

ایک شام ایک درویش خالد سہیل کو دوسرے درویش وجاہت مسعود کا غیر متوقع دوستانہ محبت نامہ موصول ہوا جس میں ایک تیسرے درویش کا مختصر تعارف تھا۔

”ڈاکٹر صاحب! وسیم میرا بیٹا بھی ہے، بھائی بھی ہے، دوست بھی اور پچھلی صدی میں طالب علم بھی تھا۔ ہمارے قبیلے سے تعلق ہے۔ اسے فیملی آف دی ہارٹ کا حصہ بنا لیں تو میری مردم شناسی (نہایت محدود) سے لطف اٹھائیں گے۔ سلامت رہیے۔“

وجاہت مسعود کا پیغام پڑھ کر پہلے دل نے اپنائیت سے کہا
؎ سر تسلیم خم ہے جو مزاج یار میں آئے

اور پھر شرارت سے سوچا کہ کیا محدود مردم شناسی کا یہ مطلب تو نہیں کہ زنان شناسی لامحدود ہے لیکن پھر اس سوچ کو نظرانداز کرتے ہوئے وسیم گردیزی کو فون کیا اور ایک ریسٹورانٹ میں ڈنر اور ڈائلاگ کی دعوت دی۔

وسیم گردیزی نے پہلی ملاقات میں ہی درویش کے دل میں گھر بنا لیا اور میں نے سوچا کہ

وسیم گردیزی خوش قسمت ہیں کہ انہیں وجاہت مسعود جیسا استاد ملا اور وجاہت مسعود خوش بخت ہیں کہ انہیں وسیم گردیزی جیسا شاگرد ملا۔

وسیم گردیزی نے پہلی ملاقات میں مجھے وہ سرپرائز دیا جو زندگی میں پہلے کبھی کسی نے نہ دیا تھا۔

ہم دونوں میرے شاعر چچا عارف عبدالمتین کے مداح نکلے۔ میں نے انہیں عارف عبدالمتین کے اردو اشعار سنائے تو انہوں نے مجھے عارف عبدالمتین کے پنجابی اشعار سنائے۔ میں نے اس حیرت بھری ملاقات کا ذکر عارف عبدالمتین کے بیٹے اور اپنے کزن نوروز عارف سے بھی کیا۔

مجھے یہ جان کر خوش گوار حیرت ہوئی کہ وسیم گردیزی نہ صرف پنجابی کے شاعر ہیں بلکہ انہوں نے عالمی ادب کی کہانیوں کے پنجابی میں تراجم بھی کیے ہیں۔

(رنگ رس عالمی افسانوں کا پنجابی ترجمہ اور رب راکھا چپس جی جیمز ہلٹن کے ناول گڈ بائی مسٹر چپس کا پنجابی ترجمہ ہے )

اس کے علاوہ وہ پنجابی کے محقق اور سکالر بھی ہیں۔ انہوں نے ہیر وارث شاہ کے کرداروں کا نفسیاتی تجزیہ بھی کیا ہے۔

وسیم گردیزی سے دوسری ملاقات میں میں نے انہیں بتایا کہ میں نے نصف صدی کی خدمت خلق کے بعد اپنے کلینک سے ریٹائرمنٹ لینے کا فیصلہ کیا ہے تا کہ تخلیقی کام یکسوئی سے کر سکوں لیکن میں اپنی ریٹائرمنٹ سے پہلے ایک ایسی کتاب چھاپنا چاہتا ہوں جس میں میرے مریضوں کی کہانیاں ہوں گی اور نفسیاتی علاج کے بارے میں میرے مضامین ہوں گے تا کہ پاکستان میں سائیکوتھراپی کے شاگرد اور استاد ان سے استفادہ کر سکیں۔

میں نے وسیم گردیزی کو اپنی ایک پاکستانی مریضہ سبینا کی کہانی سنائی تو انہوں نے اس کہانی کا ترجمہ کرنے کا وعدہ کیا۔

ہم دونوں نے سوچا کہ اگر میں اس ترجمے کا ایک کالم بنا لوں تو ہم دونوں مل کر وجاہت مسعود کو سرپرائز دیں گے کہ انہوں نے جن دو درویشوں کا غائبانہ تعارف کروایا ہے اب ان دو درویشوں کی آپس میں بھی ادبی دوستی ہو گئی ہے

؎ غالب ندیم دوست سے آتی ہے بوئے دوست
وسیم گردیزی نے، ہم سب، کے قارئین کے لیے میری مریضہ سبینا کے جس خط کا ترجمہ کیا ہے وہ حاضر خدمت ہے۔

سبینا کی کہانی

محترمی ڈاکٹر سہیل!

آپ ریٹائر ہونے کی تیاری کر رہے ہیں اور میں تھراپی کے اس سفر کے بارے میں سوچ رہی ہوں جو ہم نے پچھلے سات برس میں مل کر کیا ہے۔ میں اپنے جذبات کا اظہار کرنا چاہتی ہوں کہ وہ تھراپی میرے لیے کتنی اہمیت افادیت اور معنویت کی حامل تھی۔

جب میں پہلی بار آپ کے دفتر میں آئی تو میں ایک بے نام سا ایسا بوجھ اٹھائے ہوئے تھی جس سے نبرد آزما ہونا میرے بس کی بات نہ تھی۔ میں نے آپ کی شخصیت میں ایک ماہر نفسیات ہی نہیں ایک ہمدرد استاد بھی پایا۔ آپ کا صبر تحمل اور بردباری کا جذبہ مجھے بہت بھایا۔

میں آپ سے ہر ہفتے ملتی اور آپ کی ملاقاتوں سے استفادہ کرتی۔ ان ملاقاتوں سے میری شخصیت میں ایک ٹھہراؤ پیدا ہوا۔

اس سفر کے دوران جب بھی میرا تاریک اور الجھنوں سے واسطہ پڑا آپ نے ذہنی صحت کے راستے میں میری رہنمائی کی۔

آپ نے میرے مسائل کو غور سے سنا
مجھ سے مشکل سوال پوچھے
اور اپنی حکمت اور بصیرت سے میرے مسائل کو حل کرنے میں میری مدد کی۔
آپ نے میری جلد بازی کو کم کرنے
اور اپنے اندر خوف کی بجائے تجسس سے دیکھنے میں
میری مدد کی۔

آپ کی مدد کی وجہ سے اب مجھ میں صبر کا اور اپنے ساتھ ہمدردی سے پیش آنے کا جذبہ بڑھ گیا ہے۔

آپ نے مجھے جو سب سے زیادہ معنی خیز اور قیمتی تحفہ دیا وہ لکھنے کی عادت تھی۔ میں نے کبھی سوچا بھی نہیں تھا کہ ایک سادہ قلم اور کاغذ جو کچھ میں محسوس کر رہی ہوں اس پر عمل کرنے، اپنے خیالات کو سمجھنے، یا جب سب کچھ دھندلا محسوس ہوتا ہے تو وضاحت تلاش کرنے میں میری مدد کرنے میں کتنا طاقتور ہو سکتا ہے۔ تحریری لوازمات جو آپ نے ہمارے کام میں متعارف کرائے ہیں وہ میری زندگی کے لیے ضروری ہو گئے ہیں۔ نہ صرف عارضی بلکہ ایک دیرپا بنیادی سہارے کے طور پر جسے حاصل کرنے کے لیے میں ہمیشہ واپس آ سکتی ہوں۔ یہ مشق تھراپی کے سیشن کے بعد بھی میری رہنمائی کرتی رہتی ہے۔

کلینک کی تھراپی کے علاوہ جو کچھ بھی آپ نے ذاتی طور پر میرے لیے کیا ہے، میں اس کے حوالے سے بھی آپ کا شکریہ ادا کرنا چاہتی ہوں۔ آپ نے میرے عزیزوں کے ساتھ بھی فراخ دلی کا ثبوت دیا۔ آپ نے اپنے ذاتی وقت پر پاکستان میں میرے دوستوں کے ساتھ بات کرنے کے لیے، ان کی رہنمائی اور ہمدردی کی پیشکش کی جس کے بدلے میں کبھی بھی کچھ مانگے بغیر، آپ نے اسے ان کے لیے ایک تحفہ قرار دیا۔ آپ نہیں جانتے کہ آپ کی بے لوث خدمت سے ساری دنیا میں کتنے لوگ مستفید ہوتے ہیں۔

تھراپی کے دوران ایسا وقت بھی آیا جب مجھے یقین نہیں تھا کہ تبدیلی ممکن ہے۔ جب میں نے محسوس کیا کہ میں مسائل میں گھر گئی ہوں اور پھنس گئی ہوں تو آپ کی غیر متزلزل حمایت نے مجھے پراعتماد رکھنے میں میری مدد کی۔ اب اگر میں پیچھے مڑ کر دیکھتی ہوں، کہ میں کہاں تک آ گئی ہوں۔ اس لیے نہیں کہ سب کچھ حل ہو گیا یا آسان ہو گیا، بلکہ اس لیے کہ میں مضبوط، زیادہ باخبر، اور زندگی کی مشکلات سے نبرد آزما ہونے کے لیے زیادہ بہتر ہو گئی ہوں۔ اس کی وجہ وہ جگہ ہے جو ہمارے ساتھ مل کر کیے گئے کام اور شفایابی کے لیے آپ نے بنائی ہے۔

آپ کی طبی مہارت سے ہٹ کر، جو چیز میرے لیے سب سے نمایاں ہے وہ آپ کی انسانیت سے دوستی ہے۔ آپ نے مجھے کبھی بھی کسی دوسرے مریض یا کسی اور کیس کی طرح محسوس نہیں کروایا۔ آپ نے مجھے ایک مکمل شخص کے طور پر دیکھا، احترام کے ساتھ، قدر کے ساتھ، اور صلاحیت کے ساتھ۔ اس قسم کی دیکھ بھال نایاب ہے، اور میں اسے کبھی نہیں بھولوں گی۔

اب جب کہ آپ زندگی کے اگلے پڑاؤ کی تیاری کر رہے ہیں میں امید کرتی ہوں کہ آپ اپنے ساتھ اس آگاہی کو لے کر چلیں گے کہ آپ نے کتنی زندگیوں کو چھوا ہے۔ بشمول میری۔ آپ اپنے پیچھے شفایابی، امید اور طاقت کی میراث چھوڑے جا رہے ہیں جو آپ کے دفتر کی دیواروں سے بہت آگے تک پھیلی ہوئی ہے۔ میں تصور کرتی ہوں کہ ریٹائرمنٹ کا سفر آپ کے لیے اپنی نوعیت کا امن اور سکون لائے گا۔ میں واقعی امید کرتی ہوں کہ یہ آپ کو وقت، خوشی اور آرام فراہم کرے گا جس کے آپ بہت زیادہ مستحق ہیں۔

اگرچہ الوداع کہنا مشکل ہے، میں اپنے دل میں بے پناہ شکرگزاری کے جذبات کے ساتھ ایسا محسوس کرتی ہوں۔ آپ کا شکریہ، ڈاکٹر سہیل، آپ نے مجھے جو کچھ بھی دیا ہے۔ آپ کا وقت، آپ کی حکمت، آپ کا صبر، اور آپ کی دیکھ بھال۔ جب مجھے سب سے زیادہ ضرورت پڑی تو آپ نے میرا راستہ تلاش کرنے میں میری مدد کی، اور میں ہمیشہ آپ کی رہنمائی اپنے ساتھ رکھوں گی۔

دل کی گہرائیوں سے آپ کی مسیحائی کی مداح
سبینا

ڈاکٹر خالد سہیل

ڈاکٹر خالد سہیل ایک ماہر نفسیات ہیں۔ وہ کینیڈا میں مقیم ہیں۔ ان کے مضمون میں کسی مریض کا کیس بیان کرنے سے پہلے نام تبدیل کیا جاتا ہے، اور مریض سے تحریری اجازت لی جاتی ہے۔
Subscribe
Notify of
guest
6 Comments
نعیم اشرف
نعیم اشرف
11 months ago

بہت خوب صورت سپاس نامہ ۔ پڑھ کر ہم آپ کے پہلے سے زیادہ مداح ہو گئے ہیں ۔ اگر کسی مریض کا کوئی خط باقی ہو اور ترجمہ چاھتا ہو تو ناچیز حاضر ہے ۔ لکھتے رہیں ۔
غالب ندیم دوست سے آتی ہے بوئے دوست
مشغول حق ہوں بندگی بوتراب میں

ڈاکٹر سارہ علی
سارہ علی
11 months ago

وسیم گردیزی صاحب کا ترجمہ اور سبینا کی کہانی میں انسانیت کا پیغام لاجواب ہیں دوستوں کا دوست اگر کسی کو کہا جاۓ تو وہ ڈاکٹر خالد سہیل ہیں محبت بھرا کالم

آغاگل
آغاگل
11 months ago

میرا خیال ھے کہ انسان دوست ھمدرد شخصیت کو تو ریٹائر ھونے کا سوچنا بھی نہیں چاہیے ۔ یہ تو -Higher soul -ھی کا مقام ھے ۔ یہ کوی عام پروفیشن تو نہیں ۔ ریٹائر ھوئے تو ان کا کیا بنے گا –

وجاہت مسعود
وجاہت مسعود
11 months ago

محترم ڈاکٹر خالد سہیل اور محترم ڈاکٹر وسیم گردیزی، دو خوش رنگ پھولوں کی ملاقات اور پھر اس rendezvous کے تخلیقی دوستی میں مبدل ہونے پر دلی خوشی ہوئی۔ ڈاکٹر خالد سہیل تو عشروں سے غالبؔ کے اس مصرعے کی زندہ تشریح ہیں، ’ تھا میں گلدستہ احباب کی بندش کی گیاہ‘۔ ڈاکٹر وسیم گردیزی سے درخواست ہے کہ کسی روز بہتے پانیوں میں پائوں لٹکا کر خالد سہیل کو وہ پنجابی گیت بھی سنایئے گا ۔۔۔۔ (۱)

وجاہت مسعود
وجاہت مسعود
11 months ago

جو ہم دونوں ٹیوب ویل کی کچی چھت پر بیٹھ کر ڈوبتے زرد سورج کی طرف منہ کر کے گایا کرتے تھے۔ ڈاکٹر خالد سہیل کے ایک اساطیری نفسیاتی معالج ہونے میں ان کے کن رس ہونے کو بڑا دخل ہے۔ سلامت رہیے

رضوانہ شیخ
رضوانہ شیخ
11 months ago

ڈاکٹر صاحب، سبینا کی کہانی پڑھ کر بہت مثبت احساس ہورہا ہے۔ ایسی مزید کہانیاں بھی ضرور ہم تک پہنچائیے گا۔

Related Articles

Back to top button
✕
HumSub

FREE
VIEW