بلاگفیچرز

امریکہ کا ہائیڈروجن بم اور چین کا ہائیڈروجن ریلوے انجن

anwar iqbal

تاریخ کے کسی سنسان لمحے میں، بحرِ الکاہل کے نیلے پانیوں کے درمیان واقع جزیرے ”اینیوئی ٹاک ایٹول“ پر جب صبح کی پہلی روشنی پڑی تو کسی نے اندازہ نہیں کیا تھا کہ انسان ایک ایسا دروازہ کھولنے والا ہے جس کے پیچھے تباہی کی آنکھیں جل رہی تھیں۔ یکم نومبر 1952 کو امریکہ نے ”آپریشن آئیوی“ کے تحت اپنا پہلا مکمل تھرمو نیوکلیئر بم یعنی ہائیڈروجن بم آزمایا۔ یہ صرف ایک دھماکہ نہیں تھا بلکہ انسانی عقل اور جنون کا ٹکراؤ تھا۔ انگارے کی وہ روشنی جزیرے کے وجود کو چند لمحوں میں فنا کر گئی، ریت پگھل کر شیشہ بن گئی، پانی بھاپ بن کر آسمان کی طرف اٹھا، اور تابکاری بادلوں کی شکل میں دور تک پھیل گیا۔ ہائیڈروجن، ستاروں کے دل کا ایندھن، زمین پر انسان کے ہاتھوں تباہی کا سب سے مہلک ہتھیار بن گیا۔ یہ وہ لمحہ تھا جب دنیا نے پہلی بار یہ جانا کہ اگر سائنس سمت کھو جائے تو کائنات کی وہ تخلیقی قوتیں بھی انسانی ہاتھوں میں آ کر قیامت کا رنگ اختیار کر لیتی ہیں۔ امریکہ نے دکھایا کہ ہائیڈروجن صرف ایندھن نہیں، بلکہ تقدیر بھی بن سکتی ہے۔ اور اگر ناپختہ ہاتھوں میں جائے تو بربادی کی تحریر بھی۔

چند برس بعد ، چین نے بھی خاموشی سے اس راہ کا رخ کیا۔ 17 جون 1967 کو، چین نے لوپ نُور ریگستان میں اپنا مکمل تھرمو نیوکلیئر ہائیڈروجن بم آزمایا، جس سے تقریباً 3.3 میگا ٹن توانائی خارج ہوئی۔ وہ ریگستان چند لمحوں میں روشنی اور آگ کا منظر بن گیا۔ چین نے یہ قدم اٹھا کر خود کو سرد جنگ کے ایک طاقتور کھلاڑی کی صف میں کھڑا کر لیا۔ اس کے بعد 2020 کی دہائی میں، چین نے ایک غیر نیوکلیئر مگر ہائیڈروجن پر مبنی حرارتی آلے کا بھی تجربہ کیا، جس نے ایک انتہائی تیز فائر بال پیدا کیا، TNT کے مقابلے میں تقریباً 15 گنا طویل۔ یہ ہائیڈروجن کی نئی شکل تھی۔ تخریب کے کنارے پر جھولتی، لیکن نیوکلیئر آگ سے فرق کرتی۔ مگر تقدیر کا عجیب کھیل ہے کہ جو طاقت ایک روز تباہی لاتی ہے، وہی اگلے دن انسانیت کی تعمیر بن سکتی ہے۔ اسی چین میں جس نے کبھی ہائیڈروجن کی طاقت کو بم کی شکل میں آزمایا تھا، آج وہی ہائیڈروجن ایک خاموش، روشن اور بے آواز قوت کی صورت میں فولادی پٹریوں پر دوڑ رہی ہے۔ یہ ہے چین کا پہلا ہائیڈروجن کی طاقت سے چلنے والا ریلوے انجن۔

لی جُو، جو کئی برس تک ایک عام انجینئر تھا، آج اس نئی یکتا مشین کے سامنے کھڑا اسے ایسے دیکھ رہا تھا جیسے کوئی شاعر ایک نئی دنیا کا پہلا جُملہ پڑھ رہا ہو۔ اس ریلوے انجن میں وہ تکنیکی کامیابیاں تھیں جنہیں پہلے صرف خواب میں دیکھا گیا تھا: 2,400 کلو واٹ کی طاقت، 560 کے این کے کا اسٹارٹنگ ٹریکشن، ڈیزائن اسپیڈ 100 کلومیٹر فی گھنٹہ، اور اندر ہائیڈروجن فیول سیل + لِتھیم بیٹری کا امتزاج۔ جب اس نے ایک تجرباتی ٹرائل میں 10,000 ٹن وزنی مال گاڑی کھینچی، تو ورکشاپ میں ایک جشن کا سماں بندھ گیا۔ مزید ترقی کے ساتھ، 2025 کے وسط میں، چین نے لوئُپانشُوئی شہر کی مخصوص لائن پر اپنی پہلی کمرشل ہائیڈروجن مال گاڑی چلائی۔ اس ریل نے ثابت کیا کہ ہائیڈروجن صرف ٹیکنالوجی نہیں، ماحول دوست سواری کا راستہ بھی ہے۔ اس کے بعد ایک ماڈل نے 150 کلومیٹر فی گھنٹہ کی رفتار کا ٹیسٹ پاس کیا۔ یعنی سامان اور مسافر دونوں شعبوں میں ممکنہ نقل و حرکت کا ایک نیا باب کھل گیا اور اب، یہ داستان صرف چین کی اندرونی کامیابی تک محدود نہیں رہی۔ چین نے اپنی اس ٹیکنالوجی کو عالمی سطح پر متعارف کرانا شروع کر دیا۔

مثال کے طور پر، مئی 2025 کو چین کی ریل گاڑیاں بنانے والی کمپنی زیانگ سی آر آر سی کمپنی نے قزاقستان کو سی کے ڈی سکس ایچ ماڈل کا نیو انرجی ریل انجن برآمد کیا، جو ایک ”سیریلائزڈ نیو انرجی لوکوموٹیو“ پروجیکٹ تھا اور سرد علاقوں کے لیے خاص طور پر ڈیزائن کیا گیا تھا۔ اس ماڈل میں منفی 50 ° سیلسیس تک کام کرنے کی صلاحیت، 45 فیصد سے زائد ایندھن کی بچت، اور 80 فیصد شور میں کمی جیسی خصوصیات ہیں۔ اس برآمد سے چین نے گرین ٹرانسپورٹیشن کا نیا ”حل“ بین الاقوامی سطح پر پیش کیا۔ مزید برآں، اس سے پہلے دسمبر 2024 میں ہی سی سی آر سی نے اپنے ہائیڈروجن فیول سیل سے چلنے والے ریلوے انجن کو چلی کی بندرگاہ انٹوفاگاسٹا میں استعمال ہونے کے لئے برآمد کر دیا تھا۔ جو جنوبی امریکہ میں پہلا ہائیڈروجن ریلوے انجن تھا۔ یہ برآمدات اس بات کی علامت ہیں کہ چین نہ صرف اپنے اندر توانائی کا انقلاب لا رہا ہے بلکہ دنیا بھر کو ایک بہترین ”حل“ فراہم کرنے والا بھی بن رہا ہے۔ ایسے ممالک جنہیں روایتی انجنوں سے نجات چاہیے، وہ چین کی ہائیڈروجن ریلوے انجن ٹیکنالوجی کی طرف دیکھنے لگے ہیں۔

اب دنیا کا روایتی ریلوے نظام ایک مکمل تبدیلی کے دہانے پر ہے۔ بھاپ کی ریل گاڑیاں، جو کبھی صنعتی انقلاب کی نقیب تھیں، اب میوزیم کا حصہ بنتی جا رہی ہیں۔ ڈیزل انجن، جنہوں نے بیسویں صدی کا عروج دیکھا، اب کاربن قوانین اور ماحولیاتی دباؤ کی زد میں ہیں۔ بڑے ممالک میں اگلے ایک دہائی یا اس سے زیادہ عرصے میں ڈیزل انجن کی جگہ ہائیڈروجن سے چلنے والے انجن آ جائیں گے۔ ان کی جگہ ریلوے انجن کی تین نئی نسلیں آئیں گی: ہائیڈروجن فیول سیل ریل گاڑیاں، بیٹری برقی ریل گاڑیاں، اور ہائبرڈ برقی ریل گاڑیاں۔ ہائیڈروجن ٹیکنالوجی ایسے علاقوں میں خاص اہمیت رکھے گی جہاں بجلی کی لائن بچھانا مشکل ہو، یا جہاں ماحولیاتی قوانین سخت ہوں۔ بیٹری ریل گاڑیاں شہروں کے درمیان خاموش، تیز اور موثر نقل و حرکت فراہم کریں گی، اور AI کی مدد سے ریلوے سسٹم ”سمارٹ ہائی ویز“ بن جائیں گے۔ سگنل خودکار ہوں گے، ریل گاڑیاں خود بخود چلیں گی، اور انسداد حادثات کا نظام خود ہی کام کرے گا۔ مال گاڑیاں اب ٹرکوں کے مقابلے میں اتنی موثر ہوں گی کہ پورے سپلائی چین کا رخ ریل کی پٹری کی طرف مڑ جائے گا۔

تصور کیجیے : شام کی نرم روشنی میں ایک ہائیڈروجن ریلوے انجن خاموشی سے پٹریوں پر دوڑ رہا ہے۔ اس کے پیچھے دھوئیں کا بادل نہیں بلکہ پانی کی ٹھنڈی سانس ہے۔ رفتار 100 کلومیٹر فی گھنٹہ سے اوپر ہے مگر شور نہ ہونے کے برابر۔ جیسے ہوا کے کاندھے پر رکھا کوئی چراغ آگے بڑھ رہا ہوں۔ اور بہت دور، ایک پرانا ڈیزل انجن اس نئی ٹیکنالوجی کے شاہکار پر اپنی زندگی کی آخری نگاہ ڈال رہا ہے۔ جیسے ماضی نے مستقبل کو سلام کیا ہوں۔

یہ منظر وہ ہے جہاں سائنس ادب بن جاتی ہے، اور ادب سائنس کی تصدیق۔ لوہے کی پٹریوں پر دوڑتی مشینیں صرف مشینیں نہیں، انسان کے خواب، اس کی عقل، اور اس کی امیدیں ہیں۔

ہائیڈروجن کی آگ سے ہائیڈروجن کی روشنی تک۔
تباہی کی حرارت سے تعمیر کی ٹھنڈک تک۔
بم کی ہلچل سے انجن کی خاموش دوڑ تک۔
اور یہی انسانیت کی اصل جیت ہے۔

Subscribe
Notify of
guest
0 Comments

Related Articles

Back to top button
✕
HumSub

FREE
VIEW