قبائلی علاقوں میں قیام امن ایک ایسا چیلنج ہے جو برسوں سے ہمارے سامنے منہ کھولے کھڑا ہے۔ سوال یہ نہیں کہ امن کیسے قائم ہو بلکہ یہ ہے کہ کیا ہم اسے پائیدار بنانے کے لیے تیار ہیں؟ اگر فوجی آپریشنز سے ہٹ کر بات کی جائے تو امن کے راستے کتنے کٹھن ہیں اور اگر یہی آپریشنز واحد حل ہیں تو پھر بیس سے زائد آپریشنز کے باوجود ہم وہیں کیوں کھڑے ہیں؟
پہلے بات کرتے ہیں کہ فوجی آپریشنز کے بغیر امن کیسے ممکن ہے۔ قبائلی علاقوں کی زمین اپنی ثقافت، روایات اور تاریخ کی وجہ سے منفرد ہے۔ یہاں امن کے لیے بندوق سے زیادہ دل جیتنے کی ضرورت ہے۔ مقامی عمائدین اور رہنماؤں کے ساتھ مذاکرات اس کا پہلا قدم ہو سکتے ہیں۔ جرگے اور روایتی تنازعہ حل کرنے کے طریقوں کو نئی زندگی دینے سے اعتماد کی فضا بنائی جا سکتی ہے لیکن یہ کافی نہیں۔ غربت اور بے روزگاری یہاں کے لوگوں کو شدت پسندی کی طرف دھکیلتی ہیں۔ اگر سڑکیں بنائی جائیں، سکول کھولیں جائیں، چھوٹے کاروباروں کو فروغ دیا جائے اور زراعت کو ترقی دی جائے تو لوگوں کے ہاتھ میں بندوق کے بجائے روزگار ہو گا۔ تعلیم، خاص طور پر لڑکیوں کی تعلیم، اس خطے کی تقدیر بدل سکتی ہے۔ جب ایک ماں پڑھی لکھی ہوگی تو وہ اپنے بچوں کو شدت پسندی کی بجائے ترقی کی راہ دکھائے گی۔
اسی طرح، مقامی گورننس کو مضبوط کرنا ناگزیر ہے۔ جب لوگوں کو فیصلہ سازی میں شامل کیا جائے گا، ان کا احساس محرومی کم ہو گا۔ صحت، صاف پانی اور انصاف تک رسائی جیسے بنیادی حقوق دینے سے لوگ خود کو ریاست کا حصہ سمجھیں گے۔ سرحد پار سے دہشت گردی کو روکنے کے لیے پڑوسی ممالک کے ساتھ تعاون بھی ضروری ہے۔ یہ سب طویل مدتی اقدامات ہیں، لیکن امن کا کوئی شارٹ کٹ نہیں ہوتا۔
اب دوسرا سوال کہ اگر فوجی آپریشنز ہی واحد راستہ ہیں تو پھر اتنی کارروائیوں کے باوجود امن کیوں خواب رہا؟ حقیقت یہ ہے کہ آپریشنز فوری خطرات سے نمٹنے کے لیے ہوتے ہیں لیکن وہ تنازعات کی جڑیں نہیں کاٹتے۔ غربت، بے روزگاری اور تعلیم کی کمی جیسے مسائل جوں کے توں ہیں۔ آپریشنز کے دوران کبھی کبھار ہونے والے نقصانات نے مقامی لوگوں میں فوج کے خلاف عدم اعتماد پیدا کیا، جس کا فائدہ شدت پسندوں نے اٹھایا۔ سرحد پار سے دہشت گردوں کی نقل و حرکت اور ان کی مالی امداد روکنے میں ناکامی نے بھی آپریشنز کے اثرات کو محدود کیا۔
سیاسی اور انتظامی کمزوریاں بھی ایک بڑا مسئلہ ہیں۔ آپریشنز کے بعد متاثرہ علاقوں میں بحالی اور ترقی کے لیے وسائل کی کمی رہی۔ فاٹا کو قومی دھارے میں لانے کی کوششیں سست روی کا شکار رہیں۔ دہشت گرد گروہ اپنی حکمت عملی بدلتے رہتے ہیں، نئے ناموں سے ابھرتے ہیں اور ان کی نظریاتی جڑیں ختم کرنے کے لیے کوئی ٹھوس حکمت عملی نہیں اپنائی گئی۔ بین الاقوامی سیاست اور غیر ملکی مفادات نے بھی حالات کو پیچیدہ کیا۔
حقیقت یہ ہے کہ فوجی آپریشنز اکیلے امن نہیں لا سکتے۔ وہ دہشت گردی کے پھیلاؤ کو روک سکتے ہیں لیکن پائیدار امن کے لیے معاشی ترقی، تعلیم، اور مقامی لوگوں کے اعتماد کی بحالی ضروری ہے اگر ہم نے ماضی سے سبق نہ سیکھا تو آپریشنز کی تعداد بیس سے پچاس ہو جائے، نتیجہ وہی رہے گا۔ امن کی راہ مشکل ہے، لیکن ناممکن نہیں۔ ضرورت ہے ایک جامع حکمت عملی کی جو بندوق اور ترقی کو ساتھ لے کر چلے۔ سوال یہ ہے کہ کیا ہم اس کے لیے تیار ہیں؟
