کافکا کا ناولٹ: کایا کلپ

کایا کلپ کے مصنف فرانز کافکا ( 1883۔ 1924 ) جرمن زبان بولنے والے ایک یہودی ادیب تھے جن کی پیدائش پراگ (چیک جمہوریہ) میں ہوئی۔ کافکا کا شمار بیسویں صدی کے با اثر ترین عالمی ادیبوں میں ہوتا ہے۔ ان کا تعلق ایک متوسط یہودی خاندان سے تھا۔ وہ یونیورسٹی آف پراگ سے فارغ التحصیل تھے جہاں سے انہوں نے قانون کی تعلم حاصل کی۔ وہ زندگی بھر انشورنس کے شعبے سے وابستہ رہے جہاں وہ معاشی طور پر تو مستحکم تھے مگر بے چینی میں بھی عمر بیتائی۔ ان کے کام میں بے گانگی، وجودی بے چینی اور جدید زندگی کی بے معنویت جیسے موضوعات شامل ہیں۔ ادبی کامیابیوں کے باوجود وہ الگ تھلگ ہی رہے اور اپنی ذات کے ناقد بھی رہے۔

ناول کی تفصیل میں جانے سے پہلے ہم اس کے عنوان ’میٹامورفوسس‘ کے بارے میں جان لیتے ہیں۔ یہ جرمن زبان کا لفظ ہے جس کا انگریزی میں ترجمہ ’ٹرانسفارمیشن‘ ہے اور اردو میں اس کے معنی ’بڑی تبدیلی‘ کے ہیں۔

پہلی بار یہ مختصر ناول جرمن زبان میں 1915 میں شائع ہوا۔ دی ٹرائل کے ترجمے کی طرح اس ناول کا پہلا انگریزی ترجمہ بھی ولا موئیر اور ان کے شوہر ایڈون موئیر نے 1933 میں مل کر کیا۔ اردو میں اسے انجینئر منظور قریشی نے منتقل کیا۔ اس اردو ترجمے کے 96 صفحات ہیں اور اسے تین حصوں میں تقسیم کیا گیا ہے۔

کایا کلپ میں بے گانگی، اکتاہٹ، شناخت کی تلاش اور انسانی کی اندورنی کیفیات کا پریشان کن جائزہ پیش کیا گیا ہے۔ ناول کا پلاٹ سیل مین گریگر سیمسا کے گرد گھومتا ہے۔ ایک صبح جب وہ نیند سے بیدار ہوتا ہے تو خود کو ایک دیو قامت کیڑے میں بدلا ہوا پاتا ہے۔ یہ عجیب اور غیر حقیقی واقعہ جذباتی صورت حال اور سماجی ٹوٹ پھوٹ کا باعث بنتا ہے۔

اس ناول میں بیگانگی کا موضوع مرکزی حیثیت رکھتا ہے، جہاں گریگر کی کیڑے میں تبدیلی نفسیاتی و جذباتی دوری کی علامت ہے۔ اپنے خاندان کی کفالت کے لیے سخت محنت کرنے کے باوجود اسے محبت یا احسان مندی جیسے الفاظ سننے کو نہیں ملتے۔ اس کی خوفناک تبدیلی اس کی اجنبیت کو مزید بڑھاوا دیتی ہے اور خاندان جو پہلے اس پر انحصار کرتا تھا اب اسے نفرت اور بیگانگی سے دیکھتا ہے۔ گریگر کا دوسرے افراد سے بات چیت نہ کر سکنا اور ان کے رویے بدل جانا جدید زندگی کی اس بے حسی اور الگ تھلگ کر دینے والی فطرت کو ظاہر کرتا ہے جہاں انسان اپنی تمام تر جدوجہد کے باوجود اپنے پیاروں سے کٹ کر رہ جاتا ہے۔

ناول کی کہانی گریگر کے خاندان سے پیچیدہ تعلقات کو بھی اجاگر کرتی ہے۔ ابتدا میں خاندان اس کی مالی معاونت پر انحصار کرتا ہے، مگر جیسے ہی گریگر کی حالت بگڑتی ہے، ان کے رویے بھی بدلنے لگتے ہیں۔ اس کی بہن گریٹے جو پہلے اس کی دیکھ بھال کرتی ہے اور ہمدردانہ رویہ رکھتی ہے، وقت گزرنے کے ساتھ اسے بھائی کے بجائے بوجھ سمجھنے لگتی ہے اور آخر کار یہ تجویز پیش کرتی ہے کہ گریگر کو گھر سے نکال باہر کیا جائے۔ کافکا اس کہانی کے ذریعے خاندانی تعلقات میں موجود خود غرضی اور استحصالی رویوں پر تنقید کرتے ہوئے نظر آتے ہیں، جہاں خاندانی محبت اکثر مالی فوائد پر منحصر ہوتی ہے۔ جب گریگر ان کے لیے فائدہ مند نہیں رہتا تو خاندان ہمدردی کے بجائے نظر انداز کرنے اور بیزاری دکھانے لگتا ہے۔ یہ تاثر خاندانی محبت کی مشروط فطرت کو ظاہر کرتا ہے۔

اس ناول میں کافکا نے وجودیت اور معنی کی تلاش جیسے اہم موضوعات کو فکشن کے ذریعے قارئین تک پہنچانے کی کوشش کی ہے۔ گریگر کی تبدیلی اس بات کی علامت ہے کہ زندگی اکثر سماجی، خاندانی اور انسان کی ذاتی توقعات کی زنجیروں میں جکڑی ہوئی ہے، جن کی مدد سے انسان کی آزادی اور شناخت کو دبا دیا جاتا ہے۔ اپنی تبدیلی سے پہلے گریگر کی زندگی محض ذمہ داریوں اور معمول کے مطابق گزر رہی ہوتی ہے جس میں حقیقی خوشی یا ذاتی اطیمنان نہیں تھا۔ کیڑے میں تبدیل ہونے کے بعد ، گرچہ وہ سپاٹ پن سے آزاد ہو جاتا ہے مگر وہ شدید تکلیف اور مقصدیت کے خاتمے کا شکار ہو جاتا ہے۔ کافکا نے اس ناول کے ذریعے شناخت کی حساسیت اور اس پر سماجی توقعات کے اثرات کو بھی نمایاں کرنے کی کوشش کی ہے۔

کایا کلپ کافکا کا ایک لازوال ادبی شاہکار ہے جو اجنبیت، شناخت، خاندانی تعلقات اور وجودی نا امیدی جیسے موضوعات پر سیر حاصل گفتگو کرتا ہے۔ گریگر کی عجیب اور المناک کہانی کے ذریعے مصنف نے انسانی وجود کی الجھی ہوئی کیفیات کو اجاگر کیا ہے۔ ناول کا غیر حقیقی اور حیرت انگیز موضوع جدید زندگی کی بے رخی اور معنویت کا ایک طاقت ور استعارہ ہے، جہاں افراد کو ان کی ذاتی قدر کے بجائے خارجی رویوں سے پہچانا جاتا ہے۔

فرانز کافکا کا اسلوب سادگی اور نفسیاتی گہرائی کا امتزاج ہے جو اکثر غیر حقیقی اور مضحکہ خیز حالات کے ذریعے کرداروں کی بیگانگی اور وجودی جدوجہد کو اجاگر کرتا ہے۔ اس کی نثر سادہ اور غیر مرصع ہوتی ہے مگر ظاہری سادگی کے پسِ منظر میں سنجیدہ، جذباتی اور فلسفیانہ پرتیں پوشیدہ ہوتی ہیں۔